ALİMLƏRDƏN EKOLOJİ HƏYƏCAN TƏBİLİ
Bu gün, 5 iyun, BMT-nin təşəbbüsü ilə hər il qeyd olunan Dünya Ətraf Mühitin Qorunması Günüdür. Bu münasibətlə bir sıra beynəlxalq təşkilatlar ətraf mühitin hazırkı vəziyyəti ilə bağlı yeni araşdırmalar açıqlayıblar.
Stokholm Ətraf Mühit İnstitutunun dərc etdiyi hesabatda bildirilir ki, dünya üzrə təmiz su ehtiyatlarının 60%-i çirklənmə və iqlim dəyişikliyi səbəbindən təhlükə altındadır. NASA və NOAA-nın birgə hazırladığı “İqlim Trendləri 2025” sənədində isə vurğulanır ki, 2024-cü il tarixdə qeydə alınan ən isti illərdən biri olub.
İqlim dəyişikliyinin insan sağlamlığına təsiri də diqqət mərkəzindədir. “The Lancet” tibb jurnalında yayımlanan son araşdırma göstərir ki, artan istilər və hava çirkliliyi ürək-damar və tənəffüs xəstəliklərinin artmasına səbəb olur.
Mütəxəssislər xəbərdarlıq edirlər ki, ekoloji tədbirlərin təxirə salınması həm təbiətə, həm də insan sağlamlığına ciddi təsirlər göstərə bilər.
Bəs bizim hər birimizin ətraf mühiti qorumaq üçün vəzifəmiz nədir?
Mütəxəssislər bildirir ki, dünyanı qorumaq istəyən hər kəs tullantıları azaltmalı, təkrar istifadə və çeşidləmə vərdişini tətbiq etməlidir. Enerji və suya qənaət edərək resurslardan səmərəli istifadə etməyə çalışmalıdır. Ətraf mühiti çirkləndirməmək üçün ictimai yerlərdə təmizliyə riayət etmək və yaşıl nəqliyyat vasitələrinə üstünlük vermək vacibdir.