AZƏRBAYCAN RESPUBLİKASININ SƏHİYYƏ NAZİRLİYİ

Səhiyyə Nazirliyində ABŞ-ın “GE Healthcare” şirkətinin Rusiya və MDB ölkələri üzrə prezidenti və İcraçı direktoru Yelena Legezinanın rəhbərlik etdiyi nümayəndə heyəti ilə görüş keçirilib.
Qonaqları salamlayan Azərbaycanın səhiyyə naziri Teymur Musayev “GE Healthcare” şirkətinin dünyada tibbi avadanlıq və texnologiyaların aparıcı istehsalçılarından biri olduğunu qeyd edib: “Şirkətin dünyanın qabaqcıl xəstəxanalarının yüksək keyfiyyətli diaqnostik vizualizasiya avadanlığı, eyni zamanda MRT və ultrasəs aparatları, müasir İT həlləri ilə təmin edilməsi sahəsində zəngin təcrübəsi, mütəxəssislərə differensial diaqnostika zamanı dəqiq məlumat əldə etməyə imkan verir. Bundan əlavə, “GE Healthcare” texnologiyaları həkimlərin və tibb müəssisələrinin səmərəliliyini artırmağa və bir çox xəstəliklərin müalicəsinin dəqiq üsullarını seçməyə kömək edir”.
Sonda Azərbaycanın səhiyyə naziri ikitərəfli əməkdaşlığın inkişaf edəcəyinə əminliyini ifadə edib.
Səmimi qəbula görə minnətdarlığını bildirən “GE Healthcare” şirkətinin Rusiya və MDB ölkələri üzrə prezidenti belə görüşlərin təcrübə və bilik mübadiləsi baxımından vacibliyini vurğulayıb.
Görüş zamanı tərəflər müxtəlif sahələrdə qarşılıqlı əməkdaşlıq üçün potensial imkanları müzakirə ediblər.