ƏMRİ TƏBİB İMZALAYIB
Ötən ay yoxlamaların aparıldığı Respublika Endokrinoloji Mərkəzinə direktoru Nərmin İsmayılova vəzifəsindən azad edilib. TƏBİB-in İdarə Heyətinin sədri Vüqar Qurbanovun əmri ilə sözügedən vəzifəyə Kəmalə Ağayeva gətirilib.
Xatırladaq ki, Baş prokuror yanında Korrupsiyaya qarşı Mübarizə Baş İdarəsində Respublika Endokrinoloji Mərkəzinin vəzifəli şəxslərinin qanunsuz hərəkətləri ilə bağlı daxil olmuş məlumat əsasında əməliyyat-axtarış tədbirləri keçirilib.
Qeyd edilən Mərkəzin vəzifəli şəxsləri tərəfindən öz həqiqi təsir imkanlarından istifadə edilərək digər vəzifəli şəxslərin qərarına qanunsuz təsir etməklə şəkərli diabet xəstəliyindən əziyyət çəkən şəxslərin qeydiyyata alınması, onların müxtəlif dərman vasitələri ilə təmin edilməsi və bu kimi başqa məqsədlərlə ayrı-ayrı şəxslərdən müxtəlif məbləğlərdə pul vəsaiti almalarına və vəzifə səlahiyyətlərindən sui-istifadə etmələrinə əsaslı şübhələr müəyyən edilib.
Toplanmış ilkin sübutlar əsasında Cinayət Məcəlləsinin 308.1, yəni vəzifə səlahiyyətlərindən sui-istifadə və 312-1.1-ci , yəni vəzifəli şəxsin qərarına qanunsuz təsir göstərmə maddələri ilə cinayət işi başlanıb.